جدول تنظيف المنزل

10:38:00 ص


 السلام عليكم 


تأخرت بطرح الموضوع جدا متأسفة
كنت احاول اعدل الجدول عشان يناسب الأغلب
حاليا أنا في بيت أمي و البيت كبير مرره
وانا ماسكه الشغل لان امي موظفه
فجدولي اللي ماشية  عليه هذا 
التحميل هنا

يشمل بيتين تقريبا بيتنا والاستراحة التابعة له فالحمامات كثيرة والغرف كثيره
وكل شي عندنا ثنين مطبخين ومقلطين 2 مجلس رجال 2 مجلس حريم
وما فيه شغالة فلازم ارتب وقتي كذا ولا ماراح ينظف شي
فاللي بيوتهم كبار وحموله هذا الجدول بيصلح لهم


الجدول الثاني عدلت عليه عشان يناسب البيوت الصغيره والشقق
وكنت ماشيه عليه بشقتي سابقا
تحميل الجدول للبيوت الصغيرة والشقق هنــا

كل الجدولين في ملف وورد تقدرون تعدلون على حسب بيتكم
العمل الشهري قدامه خانه صح لأني ما امشي بالترتيب حسب الوقت والمزاج ^^!
فاللي اخلصه احط صح عنده


][ التنظيف اليومي][
نفس روتيني اليومي هنا 


][ التنظيف الاسبوعي ][
كل يوم امسك غرفه وانظفها
امسح اثاثها
واكنس الكنبات
واكنس الارض وامسح السيراميك 
واذا خلصت قفلتها

][التنظيف الشهري][ 
واضح مره مايحتاج شرح 


طريقتي بالشغل 
تنظيف الغرف
ابدا امسح الاسطح اول (المكاتب /تسريحه غرفه النوم /الطاولات الجانبيه للسرير/ الافياش/مسكات الابواب)
بعدين اكنس الكنبات بالمكنسه الكهربائية واذا مساحات ضيقه بالكنب اشيل راس المكنسه واكنس بالخرطوم نفسه
ثم الارض بمكنسة كهربائية سواء فرشة او بلاط اسهل 
بعدين امسح السيراميك بام الخيوط كذا اسميها انا :P 
 هذي مره حبيتها


 تنشف الخيوط مره ماتطلع نقط على البلاط يصير يلمع "قزازه" :) 
الجزء الرمادي بالدلويدور زي نشاف الملابس فينشفها مره بدون تعب وعصر 
من ساكو 
ودايم اخلي الدلو وراي وانا امسح عشان مارجع امشي على اللي مسحته 
وانتهي عند الباب لكل غرفة 
ومريحه تتدور من نفسها مايحتاج انتي تعصرين الخيوط بيدك 
احط غطاء خل مع المويه ونقطه مطهر 
الخل يخلي الموية تنشف بسرعة والمطهر عشان ريحته حلوه :P 
تقريبا زي هذا الفيديو 

جربت طريقتها بالصابون السائل برضو فعالة بس انا احب المطهر عشان الريحه تطلع حلوه ^ـ^
تنظيف الحمامات 
مو كلها تستخدم يوميا 
فانظف اللي يستخدم يوميا كل يوم  
بحمامي اللي عليه اغلب الاستخدام لانه قريب من الصالة
انظفه يومي مع كل وضءلصلاة الفجر
فالمطهر والفرشاة حقت الكرسي ورا الافرنجي ماتبان بس طلعتها شوي عشان تشوفونها 
(الكرسي الزهري حق الين :P)
وانظفه بصلاة الفجر مع الوضوء 
والمكنسه الطويله ورا الباب اعلقها فيه جهه لفرك الارضيه وجهه شطف 
ريحتني بايام حملي من الانحناء واستمريت عليها وماراح اغيرها ابدا
-موجودةبكل مكان-
وبدروج المغسلة مناديل ديتول المطهره امسح المغسلة فيها يومي
ولاني اسويه يومي دايم المغسلة نظيفه مافيها بقع صعبه 
هذي المناديل جبت صورتها من قوقل لان حقتي خلصت صراحه ^^! وانا اكتب الموضوع ^^! 

واذا احتاجت تنظيف عميق اجيب سلتي حقت باقي الحمامات وافركها
وفيه حركه شفت اللي يركب المغاسل الرخام يسويها 
اذا حسيتيها شهبت ادهنيها بنقطه بيبي اويل وترجع تلمع من جديد
بس مغاسل الرخام زي حقتي 
بس الرخام* باقي المغاسل لاتوسخها هالحركه
بس مغاسل الرخام لان الرخام يمتص الزيت ويعطيه لمعه
تنظيفي اليومي لحمامي  استفدت كثير من هالفيديو لجين 
شوفو طريقتها بالحمامات نفسي تقريبا بس انا اغسل الارض ما امسحها 

ولان حمامات بيتنا كثيره فكل يوم مخليته لحمام وحاطه سلة اتنقل فيها
مجمعه فيه مواد التنظيف غير مواد التنظيف اللي بحمامي الشخصي
 فاجيب السلة اللي مخصصتها لجميع الحمامات وادور على الحمامات كلها كل واحد بيومه المخصص وانظفه  تنظيف عميق 
فيها علبه صابون غسيل اليدين معبيتها مطهر وكلوركس وتايد واغسل بها الحمامات والمغاسل 
+ انائين بلاستيك صغار (واحد اعبي فيه من الصابون اللي خلطته واغسله به المغاسل والثانيه عشان اغسل بمويه المغاسل اكب على الحواف عشان يروح الصابون  مدري فهمتو علي اول لأ ^^! ) 
+ ليفه مخصصه للمغاسل بس +فرش اسنان قديمه للاماكن الضيقه (حوالين صنبور الحنفيه+الغطاء تبع الكرسي الافرنجي ) + بخاخ معقم ديتول ومويه للافرنجي ومسكات الحنفيات
+ بخاخ (مويه ونقطه خل) للمرايا
+فوطتين ميكروفايبر واحده للافرنجي ووحده للمغاسل والمرايا 

تنظيف النوافذ
النوافذ كنت انظفها بطريقة امي* بس صعبه ويبقى خطوط بالمرايا والقزاز
فصرت استخدم هالطريقة اريح ومره اسهل واسرع ونتايج تجنن مايحتاج تعيدين بورق جرايد على المراية نفس طريقة امهاتنا


فخصصت دلو اخذه وانظف اليوم اللي فيه النوافذ 

تنظيف الابواب
الابواب استخدم لها بليدج وفوطه او ملابس قطنيه قديمه 


تنظيف المطبخ
المطبخ نفس جين بكل شي 
فيديو 


بالأخير كم نقطة 
بنبه عليها لانها ساعدتني 


أولا:
لازم يكون بيتك مريح لك بالشغل 
مريح للعين يعني مافيه كركبه كثير واغراض كثيره 
اي شي ماتستخدمينه تصدقي فيه ..عطيه ناس..يستفيدون منه 
عطيه جمعية البر 
كثره الاغراض تجيب الحشرات وتخليك تتعيجيزين تنظفين
الملابس المواعين الاثاث اللي مايستخدم 
عطيه ناس محتاجينه اكثر منك أفضل من انه ياخذ حيز  على الفاضي

ثانيا : 
لازم كل شي له مكان مافيه شي ماله مكان 
مافيه اي غرض الا له درج عشان يرجع فيه لما ترتبين 
اذا فيه شي ماله درج رح يجلس برا ويحوس المكان 
مثلا الالعاب لازم لها صندوق ترجعينه فيها اوبتجلس كذا بالصالة حايسه المكان
مثلا الفوط تتعلق ورا باب المطبخ مو تجلس على الطاولة او على الكراسي 
ورا الباب مكانها فترجع له لما تنظفين 
المنظفات تحت درج المغسلة بالمطبخ (او بحالتي درج مغسلتي والمخزن ) 
وهكذا 


ثالثا:
  
نظفي وقت نشاطك اذا انتي نشاطك الصبح نظفي الصبح
اذا وقت نشاطك العصر نظفي العصر اهم شي تكون طاقتك عاليه فتنجزين باتقان وبسرعه

رابعا:
 حاولي كل منظفاتك الخاصه بمهمة معينه في سله وحدة 
مثلا تنظيف الحمامات لها سله وحده تشيلينها لما تنظفين الحمامات  
مو ترجعين وتجيبين غرض غرض ..
النوافذ سله ..وهكذا..

خامسا: 
اذا عندك اطفال حاولي تعطينهم مهام لو صغيره مثلا بنتي عمرها 3 سنين ونص 
اخليها تمسح معي الطاولات منها اشغلها معي ماتروح لشي خطر من وراي 
ومنها تتعلم تساعدني 
برضوا اخليها ترتب هي العابها لما تخلص هي تجمعها 
ملابسها عودتها من يوم بدت تمشي اعطيها هي تحطها بسلة الغسيل 
حتى الحفاظه الله يكرمكم لما كانت تلبسها
  اذا غيرت لها تقوم هي توديها الزبالة مع التعويد تمشي معك 
والان اذا جانا ضيوف وجزمهم برا حوسة عودت بنتي تحط كل جزمه مع اختها وترتبهم 
خليتها زي اللعبه اجيب كل فرده واقول وين اختها وتروح تجيب اللي زيها وترتبهم كلهم 
كافئيها بريال او حلاو اذا ساعدتك 
واذا ا سوتها من دون امر ورتبت العابها من نفسها اكافئها بلعبة جديدة 
والعكس اذا ماجمعت العابها خاصة الليقو 
تنحرم منها اسبوع كعقوبة 
لأن اكره لعبه عندي بالحياه الليقو تنثرها بالصالة واقعدي جمعي وحده وحده :"( 
واذا جمعتيها اشتهت تلعب بها مره ثانيه 
  مو قسوة لكن لازم تعرف انه العابها لما تخلص هي مسئولة عنها 
والحمد لله ماشية معي هالطريقة ^^! 

سادسا:

  موضوعي هذا عشان يساعدك بس انتي ممكن تجيبين افكار تناسبك احسن مني
او تكونين موظفه فبعض المهمات تخلينها للعاملة اللي تجي بالاسبوع كتسهيل لك
وعندي قاعده احبها مره هي
"work smarter not harder "
يعني اشتغل بذكاء احسن من الشغل بالتعب
اختصري المهمات بانك تسوينها كل يوم بثواني افض ماتتجمع فيه نهايه الاسبوع وتكون صعبه التنظيف
واستخدمي مبدا الكايزن بشغلك اختصري الوقت مثلا وانتي تغسلين المواعين جمعي الاغرض اللي بنفس الدرج سوا عشان لما تنشف وترجعينها تختصر لك الوقت والجهد بالروحه والجيه 
الكايزن تكلم عنه احمد الشقيري كثير 



وفيه كثير فيدويوهات تتكلم عنه وكيف توظفينه بكل جوانب حياتك 
مثلا هنا بالمطبخ 

لمعلومات اكثر ابحثو  عن كلمة kaizen
.
.
.
هذي طريقتي بالتنظيف  اختصرت علي الوقت والجهد 
بس كل وحده وطريقتها .. انتي واللي يناسبك 

اتمنى افدتكم واذا فيه شي حابين تسالون عنه
أو معلومة حابين تضيفونها  
بالتعليقات تحت
والله يجعل كل من استفاد من هالموضوع بميزان حسناتي ووالدتي :)

  

  

You Might Also Like

8 تعليقات

  1. يا سلام موضوع جداً جميل جميل ونظيف :)
    عجبتني جين شكلي حأبدأ متابعتها، حمامها ماشاء الله منعش

    شكراً لمشاركتنا جدولك

    ردحذف
    الردود
    1. العفو تونا ..مرره انبسطت بزيارتك وتعليقك :)
      ربي يسعدك مثل مااسعدتيني بطلتك :)

      حذف
  2. ماشالله من زمان ماقرات موضوع زي كدا الاغلب يشتغل ع البركه مع اني قرات انو لما توفر الادوات والطريقه الصحيحه توفر جهدك ووقتك
    طرح ثري لاعدمناه🌞🌼

    ردحذف
  3. ماشالله من زمان ماقرات موضوع زي كدا الاغلب يشتغل ع البركه مع اني قرات انو لما توفر الادوات والطريقه الصحيحه توفر جهدك ووقتك
    طرح ثري لاعدمناه🌞🌼

    ردحذف
  4. شكرا على هذا الموضوع للتنظيف

    ردحذف
  5. شكرا لتس الله يوفقتس

    ردحذف

الموضوعات الأخيرة

المتابعون

تويتر